මේ ගැන චුටිටක් හිතල බලන්න

29 Mar 2010 2 Comments

by priyanthabmv in Uncategorized Tags: priyanthabmv of batuwangala e-village

අපේ රට මහ අමුතුම රටක් වෙලා. ටික දවසක් ජනාධිපති වරණයට දැඟලුවා. එක එකා තරහ වුනා. ගුටි කෙළ ගත්ත. දැන් තව එකක්, පාර්ලිමේන්තු මැතිවරණයට මිනිස්සු බැහැල වැඩ. එක අතකින් මෙ මිනිස්සු හරියි කියලත් හි‍තෙනව. ඒ මොකද දන්නවද දේශපාලඥයින් කියන බොරුනිසා. අරව දෙනවයි මෙව දෙනවයි, ගමට සේවයක් කරනවයි, කියල ප්‍රචාරය කරනවනෙ,  අපේ මිනිස්සුත්  කොතනින් හරි මොනව හරි දෙනකන්නෙ බලන් ඉන්නෙ. ඉතින් වඳුරු රැල වගේ. මෙ දවස් වල දේශපාලඥයින්ගෙ වලිගෙ වගේ වෙලා. තමන්ට කීයක් හරි හොයාගන්න තියෙන දවසෙ චණ්ඩි වගේ ඉදගෙන හැම එකාගෙන්ම ගුටි කකා, ජය වේවයි කිය කියා පාරවල් වල රස්තියාදු ගහනව. ඔන්න ඔක තමයි මෙ දවස් වල මිනිස්සුන්ගෙ රැකියාව වෙලා තියෙන්නෙ. මිනිස්සු අතරට ගිහිල්ල පචයක් දෙකක් කියල මිනිස්සුන්ගෙ හිත දිනා ගෙන ඡන්ද කෑල්ලත් අරගෙන පාර්මේලින්තු ගිහිල්ල කැරකෙන පුටුවෙ වාඩිවෙලා ඒ. සී. දාගෙන ආතල් එකේ ඉන්න තමයි, ඒ අයගෙ බලාපොරොත්තු, තව

පම්රපරාවම ගොඩදෑමත් ඒ අයගෙ බලාපොරොත්තුවක්. ඒක ගැන නොදන්න මිනිස්සු රැල පස්සෙන් යනව. රැල පස්සෙන් ගිහිල්ල ගුටි කාල රෝහල් වල ඇදේ ඉදගෙන තමයි දේශපාලනය කරන්න දඟලන්නෙ. විද්‍යාපීට ගිහින් හොදට ඉගෙන ගත්තු අයත් රැකියාවල් නැතුව ගෙවල් වලට වෙලා ඉන්නව. එහෙම කරන එක අසාධාරණයි නේද. ඒ අය රටේ උගත් අය නේද. මහ ලොකුවට දේශපාලනය ගැන හිතන්න නම් ඕනතරම් අය ඉන්නව. හැබැයි රටෙ ආර්ථික, සමාජිය, සංස්කෘතික තත්වයන්,  ඒ වගේම රටේ වන අසාධාරණකම් පිළිබදව හොයන්න කවුරැත් නෑ. මම කියන්නෙ දේශපාලනය කරන එක වැරදියි කියල නෙමෙයි. ද්ශපාලනයත් අවශ්‍යයි, හැබැයි අපේ රටේ කරන විධියයි වැරදි. අනේ මිනිස්සුනේ  මේගැන චුටිටක් හිතල බලන්න. මම කියන්නෙ ඇත්ත නෙමෙයිද කියල.

ජීවිතය නම්

15 Mar 2010 3 Comments

by priyanthabmv in Uncategorized Tags: priyanthabmv of batuwangala e-village

මලකට ඊට ආවේණික වූ අහිංසක වූ සුවඳක් තියෙනවා … ඒ සුවඳ ඇත්තට පුදුම සුවඳක්. මනස දයාබරත්වයෙන් පුරවාලන ඒ සුවඳ… මොහොතකට විඳින්න. බොහොමයක් මල්වල තියෙන සුවඳ….. චුට්ටක් මේ මල් සුවඳත් එක්ක…ජීවිතය ගැන හිතුවොත් මල් හරියට බැඳීම් මවනවා….. සමහර මිනුස්සු හරියට මල් වගෙ ලස්සනයි…..සුවඳයි… ළඟ ඉඳියදිත් සුවඳයි …ළඟ ඉන්න හැම මොහොතකම මලක් වගේ සිත පුබුදුවා ගෙනයි ඉන්නෙ…. එවන් මිනිස් සමුදාය ළඟ කරුණාව… දයාව …මෛත්‍රිය… පිරිලා.

ජීවිතයත් හරියට මල් යායක් වගේ. අපි අපේ ජීවිත වලට ළං කර ගත යුත්තේ එවන් මිනිස්සු. ඔය අතරේ වැඩකට නැති ගස් වගේ කැලෑවට වැවෙනව…කිසි පිළිවෙලක් නෑ .හරියට පිළිවෙලකට නැති ජීවිත වගේ… ඒ වගේ ජීවිතයක් හරියට වසංගත රෝගයක් වගෙයි… පරක්කු වුණත් කමක් නෑ ඔබේ ජීවිතයට… ඔබේ මල් යායට …එහෙව් වල් පැලයක් වැවිලනම් අදම ඉවත් කරන්න.

සමහර වල් පැල ගලවලා දැම්මත් මුල් ඉහිරෙනව….හරියට සමහර මිනිස්සු වගේ. එහෙම මිනිස්සු අපේ ජීවිත අසුභවාදී කරන්නට පුළුවන්. මතකයේ තබා ගන්න එයාලා ඉතුරු කරලා යන අතීතයෙන් ඔබව රිදවාවි….හඬවාවි…

එහෙත් බාධක දහසක් මැද්දේ මල් පිපෙනවා… හරියට ජීවිත වගේ. ජීවිත වලට එන බාධකත් හරියට ඒ වගේ. බාධක මැදින් දිවෙන ගංගා දිය ඇලි හරි ලස්සනයි. හරියට නිකම්ම ජය ගන්න තරඟයකට වඩා බාධක දහසක් පරාද කරලා දිනන තරඟයක් වගේ.. ජීවිතයත් හරියට තරඟයක් වගේ නේද. විටෙක මටත් හිතෙනවා…..

මල් යායක් වගේ තියෙන ජීවිත… මල්වලින් ජීවත් කරන ජීවිත…හරි ලොකු සබඳතාවයක් නේද.. ඒත් මල්වල රොන් පූජා කරල තවත් ජීවිතයක් ජීවත් කරවනවා…හරියට මිනිසෙකුගේ ලේ තවත් මනුෂ්‍යයෙකුට දෙනවා වගේ….ඒත් ඔය ජීවත් කරන ජීවිතය ඩැහැගන්න තවත් මලක් බලන් ඉන්නවා….හරියටම කිව්වොත් බාඳුරා මල වගේ….අපේ සමාජයත් එහෙමයි…කවුරු හරි කරන දෙයකින් තවත් කෙනෙක් බිල්ලට දීලා කීයක් හරි හොයන මනුෂ්‍යයෙක් වගේ.

අපේ ජීවිතයයි මලයි හරි ලෙංගතුයි නේද. සමහර මල් මල්ලෝකේ වෙනස්කම් කරනවා….හරියට අපේ අම්මා අපිව හැදුවා වගේ.මල් මියැ‍දෙන කොට තවත් මලක් පිපෙනවා…ඔය වගේ මල්ලෝකෙත් සබඳතා ඇතිවෙනවා.. මිනිස්සුන්ගෙ ආදරය වගේ…

ඔය පිපුණු මල් කවදාක හරි පරවෙනවා.හරියට ජීවිත මියැදෙනවා වගේ.පරවෙන මල් ගැන කවුරුත් කතා කරන්නෙ නෑ.ඒත් පරවෙලා පිපුණු මලක් හමුවුණොත් ලෝකයම එදාට ඒ දේ ගැන කතා කරාවි. ඒ ඒ ස්වභාව ධර්මයේ පරවූ මලක් නැවත පිබිදීම හරි අහම්බයක් නිසා.. ජීවිතත් එහෙමයි… පිපිලා පරවුණු ජීවිත හරියට වැඩියි. පරවෙලා පිපිණු ජීවිත හරි අඩුයි. ඒත් ජීවිතයක් පරවුණාම මලක් පරවෙනවා… වගේ නෙමෙයි මලක් පරවුණාම.. තව මල් ගහේ තියෙනවා…දුකකුත් නැති තරම්.ජීවිතයක් පරවුණාම දුකට දහසක් දෙනා එක්වෙනවා.ජීවිතය වෙනුවෙන් අඬන්න ගොඩාක් දෙනා ඉන්නවා.ජීවිතේ මලගම කියන්න බැරි දුකක්….. ඒත් ඔනෑකමක් තියෙනවනම් ජීවිතේ ජය ගන්න පුළුවන්….ලෝකයේ එහෙම පිපිණු ජීවිතත් තියෙනවා. ඒවා පරවුණු මලක් යැයි කියන්නට බැරි තරම්….ලස්සනයි….. සමහර මිනිස්සු දැක්කම සමහර මිනිස්සුන්ට ඊර්ෂයායි…ඒත් අපි ඒ අයට සලකන්නෙ මල් වලින්මයි… ගල් මුල් වලින් නෙමෙයි…….

මම දැන් පාසලේ ප්‍රධාන ශිෂ්‍යනායකයෙක්

11 Mar 2010 3 Comments

by priyanthabmv in Uncategorized Tags: priyanthabmv of batuwangala e-village

මම මගේ බලාපොරොත්තු වලට ටික ටික ලං වෙනවයි කියල, අපේ පාසලේ ශිෂ්‍යනායක නිළ ලාංඡන පළන්දපු දවසෙ මට හිතුන. ඒ මොකද දන්නවද සිසු නයුදා 2010 ප්‍රධාන ශිෂ්‍යනායකයා බවට මාව තේරුනු හින්ද. මම සිසු නයු පදවිපත ලබන පස්වන වසර තමයි මේ. ගිය අවුරැද්දෙ උප ප්‍රධාන ශිෂ්‍යනායකයා වශයෙන් පාසලට සේවයක් කළා. මම හිතන්නෙ මගේ විදු මෑණියන්ට නායකත්වයක් ලබා දීමට හැකිවීම මා ලද භාග්‍යයක්. මම පාසලට යම් කිසි සේවයක් ඉටු කර එයින් ගෞරවයක් මට ලැබුණද, එයින් කොටසක් මම මගේ දෙමවි පියන්ට පුදකර සිටිනව,මම ස්තුතිවන්ත විය යුතුයි මාව බටුවංගල විදු මව්ගේ නායකයෙක් කළ විද්‍යාලයේ විදුහල්පති තුමියටයි, ගුරැ මව් පිය වරැන්ටයි. ඇත්තටම නායකත්වය කියන්නේ රන්මිණි මුතු වලින් හදපු ඔටුන්නක් නොවෙයි. රළු කටු සහිත වූවක් තමයි නායකත්වය කියන්නෙ. ඒ නිසා අපි මේක බොහොම පරිස්සමින් පළඳින්න ඕන. එදා මගේ බැජ් එක පළන්දන වෙලාවෙ මට දැනුනෙ මාර සතුටක්.

මං ඒ වෙලාවෙ අමිමයි තාත්තයි දිහා හොරහින් වගේ බැලුව ඒ දෙන්න කියා ගන්න බැරි සතුටින් මගේ දිහා බලාගෙන හිටිය. ඇත්තටම කොයි තරමි සතුටක් එදා ඒ දෙන්නට ඇති වෙන්න ඇත්ද. එදා තව ශිෂ්‍යනායකයො අලුතින් පත්වුනා ඒ අයත් මගේ යාළුවො.  ගෙවුණු දවස් වල මම පාසලට කළ සේවය වගේම ඉදිරියටත් අපි වගේම මමත්, මට හැකි පමණින් පාසලට උපරිම සේවය කරනව.පාසලේ ගෞරවයත් කීර්ති නාමයත් ආරක්ෂා කරනව.ඒක තමයි මගේ අධිෂ්ඨානය.ඇත්තටම මට ගොඩාක් සතුටුයි.

මෙ තමයි මගේ බැජ් එක පළන්දපු වෙලාව. image එක පොඩිඩක් අවුල් ගණන් ගන්න එපා.

මට දුන්න දුක් ගින්න

11 Mar 2010 2 Comments

by priyanthabmv in Uncategorized Tags: priyanthabmv of batuwangala e-village

මට දුන්න දුක් ගින්න ඇවිලෙයි ඉතින්
රිදවන්නෙ විදවන්නෙ මාගේ හිතින්
කොයිකාට වූවාද මේ දුක් සුසුම්
ඉවසන්න හැකිවේද දුක් මේ තරම්

අනේ දෙවියනේ මේ මිනිසුන්ට මොනව වෙලාද

09 Mar 2010 4 Comments

by priyanthabmv in Uncategorized Tags: priyanthabmv of batuwangala e-village

මටනම් හිතෙන්නෙ මේක මහ කුරිරු සමාජයක් කියල.මිනිස්සු හරි පුදුමා කාරයි.සමහර මිනිස්සු හිතන පතන විධිය පවා හරිම නරකයි.අනුන්ට කරදරයක් මිසක් උදව්වක් නම් කරන්න හිතන්නෙවත් නෑ.සමහර අයට කෙනෙක් ඉදිරියට යනව දැක්කොත් ඒක ඉවසගෙන ඉන්න බෑ. පිස්සු හැදිච්ච වගේ තමයි කටයුතු කරන්නෙ.මේ වගේ අවස්ථා වලදි සමහර මිනිස්සු ඊර්ෂයාවෙන් වෛරයෙන් පිරිල. දියුණු වෙන කෙනාගෙ ජීවිතේ ප්‍රශ්න වලින් පුරවනව.අනේ දෙවියනේ මේ මිනිසුන්ට මොනව වෙලාද.මම දෙවියන්ගෙන් ඇහුවෙ වෙන අහන්න කවුරුත් නැති නිසා.මොකද මේ ලෙඩේ හැදිච්ච අය අනිත් අයට බෝ කරනව.

මේ සමාජෙ දැන්ටත් මේවගේ අය බොහෝ දුරට ඉන්නව.මොකක් හරි බොරුවක් කියල අනෙකගෙ චරිත ඝාතනයත් ලස්සනට කරන්න පුලුවන් අය ඉන්නව.ඇයි මිනිසුන් මිනිසුන්ටම වෛර කරන්නෙ. හැම මනුස්සයෙක්ම මේ වගේ නැතුව ඇති ඒත් ලංකාව කියන්නෙ පොඩි රටක්නෙ. ඉතින් මුලු සමාජයක් විනාශ කරන එක පොඩි දෙයක්නෙ. මම නම් කියන්නෙ හැම මනුස්සයෙක්ම මිනිසාට ආදරය කළොත් මේ දේ හරියාවි. මේක බලල ඔයාලට හිතෙන දේ ලියන්න මතක්වෙලා.